Aurtengo Santikurtzak izaera berezia izango du Bizkargiko Egunean, Francoren heriotzaren 50. urteurrena gogoan hartuta. Maiatzaren 3an eta 4an ospatuko diren ekitaldiek memoria historikoa, kultura eta herri giroa uztartuko dituzte Bizkargin.
Maiatzaren 3an Santikurtz Eguna ospatuko da, ohiko lagunarteko giroan. Hurrengo egunean, maiatzaren 4an, Bizkargiko Eguna izango da, “Santikurtz errepetizino eguna” izenez ezaguna, eta jarduera ugariz beteta egongo da.
Ekintzak goizeko 11:00etan hasiko dira Soinutxikie taldearen triki-kantu-dantzekin. 11:30ean ekitaldi nagusia eta argazki erraldoia egingo dira. 12:00etan, eguneko gune nagusia izango da: oroimen ekitaldia, Francoren heriotzaren 50. urteurrena gogoan hartuta. Bertan entzungo dira Gernikako Astrako sirena-hotsa, adarra eta txalaparta, eta hitza hartuko dute: Tasio Erkizia, Eneko Larruzea, eta gazteen ordezkari bat. Halaber, parte hartuko dute Bizkargiko Dantza Taldeak, Etxanoko Nagusiaren ongietorria eta esker oneko hitzak, eta azkenik txupinazoaren jaurtiketa.
Ekitaldiaren ostean, 12:45ean, bertsolariek hartuko dute agertokia: Etxahun Lekue, Onintza Enbeita eta Txiplas. 13:00etan, berriz, Porrurik Bez elektro-txaranga izango da erromeria alaia girotzen.
Egun osoan zehar txosna ederra egongo da, parte-hartzaileek indarrak berreskuratu eta jai giroan gozatzen jarrai dezaten.
