Datorren asteazkenean, azaroaren 26an, euskararen egungo egoerari buruzko hitzaldi irekia izango da Zelaietako auditoriumean. Saioa 19:00etan izango da, eta hizkuntzaren biziberritze prozesuak gaur egun dituen erronkak eta etorkizuneko aukerak ezagutu nahi dituen edonori zuzenduta dago.
Hitzaldia Garikoitz Goikoetxeak emango du, Iñaki Iurrebasorekin batera euskararen une historikoa eta datozen urteetan izango dituen gako nagusiak sakon aztertzen dituen liburu arrakastatsu baten egilekide denak.
Liburuan jasotako gogoeta eta ondorioetan oinarrituta, Goikoetxeak diagnosi zehatz bat egingo du, hizkuntzaren egoera baldintzatzen duten ikuspegi eta errealitate ezberdinak jorratuz. Egileek adierazi dutenez, euskararen indarberritze prozesua aldaketa fase batean murgilduta dago, eta orain arte egindakoaz harago joatea ezinbestekotzat jotzen dute.
Liburuaren bidez esnatzeko deia luzatu dute: erreakzio kolektibo eta irmorik gertatzen ez bada, “atzera egiteko arrisku handia” dagoela ohartaraziz. Asteazkeneko hitzaldiak, hain zuzen ere, egoera horretaz hausnartzeko eta etorkizunerako proposamenak partekatzeko gune bat eskaini nahi du.
