Zornotzako Musika Bandaren lehenengo denboraldiaren ardatza “Konektatzen…” izango da. Bandaren zuzendariak, Aritz Labradorrek, diseinatutako programek Bandaren eta Herriaren arteko konexioa eta harremana sortzea izango dute helburu. Kontzertu bakoitzak konexio bat ezarriko du gai desberdinekin eta herriko artista askorekin.
PROGRAMAZIOA
“Bandarekin konektatzen…” – 2019ko abenduak 23, 20:15, Zornotza Aretoa.
Denboraldiko lehen kontzertu honetan, Bandarako ohiko konpositoreen errepertorioa joko da kontzertuaren lehen zatian: J. de Haan, J. P. Sousa, G. Holst, J. Strauss. Bigarren atalean aldiz, Gabonetara hurrenkera burutuko du Bandak, eta ospakizunez beteriko musika eskainiko du, sorpresaren bat barne. Eider Etxeandia abeslari gazteak ere ahotsa jarriko die abesti batzuei.
“Munduarekin konektatzen…” – 2020ko martxoak 14, 20:15, Zornotza Aretoa.
Bandak, jarraian, bidaia batera gonbidatuko du herria. Munduko musikak aztertuko ditugu edo hauetan oinarritutako obrak. Afrikatik Ameriketara, Iparraldetik Hegoaldera. Kontzertu honetan, gainera, Jon Bienzobas Pagola, Zornotzako konpositore gaztearen obra baten erabateko estreinaldia izango dugu eskuartean.
“Rock&Rollarekin konektatzen…” – 2020ko maiatzak 23, 20:15, Zornotza Aretoa.
Rock&Roll-a Zornotzan beti presente egon den heinean, denboraldiko kontzertu honetan estilo honekin egingo dugu konexioa. Lehen zatian, denboran atzera egingo dugu eta rock klasikora joango gara; Queen, Rolling Stones edota Led Zeppelin bezalako artistak ekarriko ditugu belarrira. Kontzertuaren bigarren atalean herriko bertako rock-talde batekin konexioa egingo dugu: Blanco y en Botella. Zornotzar talde honen bi disketatik ateratako zenbait abesti bertsio sinfonikoan aurkeztuko ditu Bandak.
“Herriarekin konektatzen…” – 2020ko uztaila. Zornotzako Jaietan.
Denboraldiari amaiera emateko, Zornotzako Jaietan kontzertua eskainiko du Bandak. Kontzertu honen helburua herriarekin konektatzea izango da eta horretarako, herriko artista eta elkarte kultural desberdinak igoko ditu oholtzara, Bandarekin batera. Gainera, herriarekin konexioa burutzeko asmoz, herriak abestea izango du erronka. Kontzertua kanpoan izango da.
