Zornotzan aurkeztu dute gaur Master Kaiola lau eta erdiko pilota txapelketaren X. edizioa, eta aurtengoa ez da edizio arrunta izango. Urtez urte sendotuz joan den afizionatuen arteko lehiaketak jauzi kualitatiboa eman du aurten, antolakuntzak iragarritako berrikuntzek erakusten dutenez.
Aurtengo nobedade nagusietako bat da adin muga kentzea, bai gizonezkoen mailan, bai emakumezkoenean. Orain arte 23 urtez azpikoentzat zegoen zabalik txapelketa, baina aurtengoan afizionatuen mailako edozein pilotarik parte hartu ahal izango du. “Atea irekitzeak maila handiagoa ematen dio txapelketari”, adierazi du Gorka Otaduy antolatzaileak gaur goizeko prentsaurrekoan.
Bestalde, pilotarien hautaketa ere aldatu dute. Orain arte gonbidapen bidez osatzen zen parte-hartzaileen zerrenda, baina aurten izen-emate irekia egin dute. Hasierako zalantzak bazter utzita, erantzuna “oso positiboa” izan da. “Epea ireki bezain laster konturatu ginen Master Kaiola afizionatu mailako egutegian errotuta dagoela”, azaldu du Otaduyk. Horren atzean, bere esanetan, Kepa Arroitajauregik eta Ekhi Ziarrustak azken urteetan egindako “lan bikaina” dago.
Partiduak: ordutegi berriak eta frontoia biziberritzeko apustua
Jokatzeko egunak ere aldatu dira: aurten partiduak zapatu arratsaldetan eta domeka goizetan izango dira, frontoira jende gehiago erakartzeko helburuarekin. Aurreko urteetan bariku iluntzeetan eta domeka arratsaldetan jokatzen ziren.
Txapelketako egitura honakoa izango da: emakumezkoetan maila bakarra egongo da, zortzi pilotarirekin; gizonezkoetan, berriz, bi maila izango dira —gazteak eta nagusiak—, bakoitza 32 pilotarirekin. Parte-hartzaileen artean eskualdeko hainbat pilotari daude: Aingeru Bernaola (Mañaria), Faben Ituarte (Atxondo) eta Luken Atutxa (Elorrio), besteak beste.
Faboritoak eta promesak jokoan
Txapelketak maila handia erakutsiko du aurten. Faboritoen artean daude Rekalde, Ormaetxe, Karregal, Fernandez, Amiano eta Zubizarreta, azken hau belauneko lesio batetik itzuli bada ere. Gazteen artean, Oihan Etxeberria oiartzuarra (18 urte) arreta berezia merezi duen izena da, baita Xabier Apaolaza ere, iaz finalera iritsi zen sorpresa emanez.
Lehen jardunaldia apirilaren 11n jokatuko da. Finalerdiak ekainaren 14an izango dira eta final handiak ekainaren 21ean.
Sariak ere ez dira makalak: nagusien mailako txapeldunek 700 euro jasoko dituzte, eta gazteen mailakoek, 400 euro.
