Zornotzako ordezkaria nagusitu zen atzokoan Durangon. Bizkaiko Eskolarteko Txapelketaren laugarren eta azken kanporaketa jokatu zen atzo Kurutziaga Ikastolan, eta bertan, Naroa Iturrioz zornotzarra izan zen puntu gehien batu zituena. Bere bertsoaldiak saioan nabarmendu ziren, eta horri esker, zuzenean lortu du maiatzaren 31ko finalerako txartela.
Iturriozekin batera, honako sei gazteek parte hartu zuten saioan: Aner Goikoetxea, Haizea Rotaetxea, Jon Abasolo, Maddi Aurtenetxe, Malen Ibarzabal eta Maren Armendia. Gaiak Ander Aldazabalek jarri zituen eta epaimahaia Garazi Mendoza, Beñat Romero eta Juanjo Respaldizak osatu zuten. Idazkari lanetan, berriz, Ander Elortegi aritu zen.
Finala, Iurretan
Txapelketak lau kanporaketa izan ditu guztira, eta saio bakoitzeko irabazlea zuzenean sailkatu da finalera. Beste laurak, puntuazioaren arabera. Horrela, maiatzaren 31n Iurretako frontoian jokatuko den finalean ondorengo zortzikotea arituko da:
- Aiala Irurtia (Arantzazu)
- Ekhi Zuluaga (Igorre)
- Enara Gallastegi (Dima)
- Iradi Barrenetxea (Artea)
- Jon Abasolo (Munitibar)
- Kelmene Abaitua (Berriz)
- Maddi Aurtenetxea (Zornotza)
- Naroa Iturrioz (Zornotza)
Finalaren egitaraua ere zehaztuta dago: goizeko 10:00etan izango da eskolarteko nagusien idatzizko finala, eta 11:30ean bat-bateko saioa hasiko da. Naroa Iturrioz zornotzarraren izena, beraz, finaleko karteldegian irakurriko da, merezimendu osoz.
