JON CASTAÑEDA, ‘JONKASS’ IZENEZ EZAGUNA, KAZETARI ETA MUSIKARIA DA, ETA BERE IBILBIDE PROFESIONALA IRRATIAN, TELEBISTAN ETA OHOLTZETAN BANATZEN DU. AKERBELTZ TALDEKO ETA ERRUKI ERROMERIAKO ABESLARI IZANDAKOA, ORAIN BAKARKAKO BIDEA HASI DU PROIEKTU BERRIAREKIN: JONKASS.
Bere lehen diskoa egiteko aukera Paradisu Zinema Beka irabazteari esker izan du, Iñigo Muguruzaren omenezko ekimena, EHZ festibalak, Antxeta Irratiak eta Elkar argitaletxeak babestua. Disko berria udazkenean kaleratuko da, Durangoko azokan aurkezteko asmoz. Hori baino lehen, lehen singlea iritsi da: ‘Antzoki’, Bilboko Kafe Antzokiari eskainitako kanta dantzagarria.
JonKassen proiektu berriak toki jakin batean kokatutako istorio musikalak eskaintzen ditu, entzuleak lekuz leku eramanez. Estilo musikal anitzek (folklorea, baladak, rumba, reggaeton, elektronika…) koloreztatzen dute diskoa, eta hainbat kolaborazio ere izango ditu. Helburua argia da: jendea dantzan jartzea eta, aldi berean, aldarrikapenaren bidez ahalduntzea.
“‘Antzoki’ juerga gau baten amaierako sentsazio horri buruzkoa da,” dio JonKassek. “Goi-goian zaudenean baina ez dakizunean zer etorriko den.” Kantuarekin batera, bideoklip bat ere aurkeztu dute, eta artistak jendea entzutera eta dantzatzera animatzen du.
