Amorebieta-Etxanok presentzia nabarmena izango du Bizkaiko Talento Gastro Sarien laugarren edizioan, El Correok antolatuta. Udalerriko hiru gazte daude finalisten artean; guztira hamar kategoriatan banatutako 30 hautagai dira, Bizkaiko gastronomiaren etorkizuneko promesak omentzeko.
Talento Gastro Sariak lau ediziotan erreferente bihurtu dira, sukaldetik jangelara, labea zein upategia barne, Bizkaiko kultura gastronomikoa bizirik mantentzen dutenen ahalegina eta sormena aitortzeko. Aurtengo edizioan hamar kategoria banatuko dira eta irabazleak gaur, irailaren 29an, Kobeta Mendiko Etxekobe gunean egingo den bazkarian ezagutuko dira.
Pintxo-barrarik onenaren saria irabaz dezake, berriz, Argoitz Argotek, Urtza tabernako sukaldearen arduradunak. Markel Atutxarekin batera sei urte daramatza taberna gidatzen, tokiko dendetan erositako produktuekin herriko klasikoak berreskuratuz: tortilla beteak, etxeko ogitartekoak eta hamburgerrak, besteak beste.
Pastelgile onenaren kategorian lehiatuko da Aitziber Narbarte, Bertoko Ogia obradorraren sortzailea. Zornotzan kokatutako tailerrean ari da gaur egun, Galdakaoko Ostalaritza Eskolan trebatuta eta Bilboko Zortzikoa zein Bartzelonako Oriol Balaguer maisu gozogilearekin lan eginda —2014an Espainiako Croissant Onenaren saria irabazi zuen haren taldean—.
Bestalde, Olatz Bustinza, Horma Ondo jatetxeko sommelierra, Sommelier onenaren kategoria nagusitzeko hautagai da. Mikel Bustinza sukaldariaren alaba, gaztetatik hasi zen etxean laguntzen, eta gero Artxandako eskolan trebatuta, ardoaren munduan aurkitu du bere benetako bokazioa. «Ardoaz maitemindu nintzen eta oso zoriontsu naiz jangelan lanean», dio irribarrez.
Azkenik, Jon Otxandio, Kanala Beach-eko sukaldaria, Sukaldari onenaren kategorian lehiatuko da. Amorebietan jaioa, Boroan hasi zuen ibilbidea, Mexikon eta Donostiako Aitana-n lan eginda. Orain Bizkaian itzuli da bere proiektua garatzeko eta zabaltzeko: «Pozik nago, sorpresa handia izan da Bizkaiara itzuli eta harrera bikaina izatea», adierazi du.
Itxaropena handia da, eta gaur arratsaldean jakingo da lau zornotzar horietatik inork Bizkaiko gastronomiaren talentu berria saritzeko garaikurra jasotzen duen.
