- Bizkaiko Ontzigintzako Modelismo Elkarteak antolatuta, erakusketak eskalako itsasontziak, efektu errealistak eta irrati-kontroleko teknologia uztartzen ditu.
Itsasontzi-modelismoa Amorebieta-Etxanora heldu da “Irrati Kontroleko Ontzigintzako Modelismoa / Modelismo Naval Radiocontrol” erakusketarekin, Bizkaiko Ontzigintzako Modelismo Elkarteak antolatuta. Martxoaren 28ra bitarte, Zelaieta Zentroko erakusketa aretoan eskalako itsasontzien bilduma ikusgai egongo da, guztiak erabat ibilgarriak.
Erakusketa honetan, bisitariek irrati-kontroleko itsasontzi mota ezberdinak ezagutu ahal izango dituzte: txalupak, yateak, aeroirristagailuak eta atoiontziak, besteak beste. Bertan, modelo komertzialak ez ezik, eskuz egindako piezak ere ikusgai egongo dira. Itsasontzi bakoitzak bere ezaugarri teknikoen deskribapen zehatza du; batzuek benetako modeloak erreproduzitzen dituzte, eta beste batzuk eraikitzaileen irudimenaren emaitza dira.
Erakusketako elementurik deigarrienetako bat da erakusgai dauden modelo guztiak erabat ibilgarriak direla. Argiak, soinuak, radarrak, sirenak, ke-efektuak eta ur-kanoiak ere badituzte, eta xehetasun eta errealismo maila handikoak dira.
Erakusketa herritar guztientzat irekita egongo da, eta aukera paregabea izango da irrati-kontroleko itsasontzien mundua gertutik ezagutzeko. Itsasoa, ingeniaritza txikia eta zehaztasunaren artea gustuko dutenentzat, hitzordu ezin hobea!
