Larunbat gaueko plana prest dago: Gauero bueltan da, Zelaieta Zentroan gazteentzako doako aisialdi eskaintzarekin.
Gazteentzako Gauero aisialdi programa berriro martxan jarriko da ikasturte honetan, 11 urtetik gorako neska-mutilentzat jarduera berriekin. Urritik ekainera bitartean, larunbatero 20:00etatik 23:00etara, hainbat proposamen eskainiko dira Zelaieta Zentroan.
Denboraldia irailaren 27an abiatuko da Gauerodisko jarduerarekin. Gazteentzako diskoteka izango da, dantzan aritzeaz gain dantza estilo desberdinak ikasteko aukera eskainiko duena. Ekintza hau hilabetean behin errepikatuko da.
Urriko egitaraua ere oso zabala izango da: urriaren 4an karaoke saioa egingo da, urriaren 18an Futbol Gaua, urriaren 25ean Herri Kirolak eta azaroaren 1ean ospatuko da ekitaldi berezienetako bat, Arimen Gaua, Halloween gauarekin bat eginez.
Gauero programan parte hartzea doakoa da, baina beharrezkoa da sarrera-txartela izatea. Txartel hori Zelaieta Zentroan eskatu daiteke.
Horrela, Gauero programak asteburuetan Amorebieta-Etxanoko gazteei topagune, parte-hartze eta dibertsiorako espazio bat eskaintzen die, beste urte batez.
